विघटित प्रतिनिधसभामा चौथो शक्तिका रुपमा रहेको राष्ट्रिय स्वतन्त्र पार्टी यतिबेला बैकल्पिक शक्तिहरुलाई एकजुट बनाएर फागुन २१ मा हुने प्रतिनिधसभा चुनाव मार्फत पहिलो शक्ति बन्ने दाबी गरिरहेको छ । केहि राजनीतिक दलहरुलाई समाहित गर्दै रास्वपा चर्चीत अनुहार र सामाजिक जीवनमा ख्याती कमाएका व्यक्तिहरुलाई भटाभट् पार्टीमा भित्र्याईरहेको छ । फागुन २१ का लागि तय भएको प्रतिनिधिसभा चुनावमा के बैकल्पिक शक्तिहरुले परम्परागत दलहरुलाई चुनौति दिन सक्लान त? नेपाल प्रहरीका पूर्व अतिरिक्त महानिरीक्षक विश्वराज पोखरेलले शुक्रबार राष्ट्रिय स्वतन्त्र पार्टी प्रवेश गर्नु भएको छ । उहाँले जनताको आसा र भरोसा रास्वपामा रहेको र अब यो पार्टीले मात्रै मुलुक र जनताको विश्वास जित्ने भन्दै आफु पनि परिवार्तनको एक हिस्सेदार हुन रास्वपा प्रवेश गरेको बताउनु भयो । पार्टीका सभापति रवि लामिछानेले देखाएको सपना र दिलाएको विश्वासले अब धेरै मानिसलाई यस अभियानमा जोड्ने भन्दै उहाँले परिवर्तन सस्थागत गर्न र आसा लाग्दो भविष्य बनाउन यस पार्टीको निर्माणमा लागेको बताउनु भयो ।

पोखरेलको प्रवेश पूर्व पार्टी छाड्ने नेताहरुको कारण रास्वपाले धेरै आलोचना समेत खेपेको थियो । राष्ट्रिय स्वतन्त्र पार्टी रास्वपाबाट सुमना श्रेष्ठ र सन्तोष परियायर लगायतका नेताहरु एक पछि अर्को अलग भएको बेला विवेकशील साझा पार्टी सिंगै समाहित हुँदै छ । अझ केन्द्र र विभिन्न जिल्लाहरुमा अरु राजनीतिक दल त्यागेर रास्वपा प्रवेश गर्ने नेता तथा कार्यकर्ताहरुको लहर पनि चलिरहेकै छ । यसरी पार्टीको आकार बढिरहेकान बेला रास्वपाले रहतको महसुस त गरिरहेको होला । तर फरक परिवेश र पृथक बैचारिक धार बोकेका नेताहरुसहितको उपस्थितिले अबको रास्वपा कस्तो चरित्रको बन्ला भन्ने प्रश्न समेत उब्जिएको छ । जेनजी प्रदर्शन लगत्तै तत्कालिन सांसद तथा रास्वपा केन्द्रीय सदस्य सुमना श्रेष्ठले पार्टीको लाइन छाडेर सरकार बनाउने संवादहरुमा सहभागि हुँदै गर्दा रास्वपाभित्र हलचल नै मच्चिएको थियो । नागरिकस्तरबाट समेत धेरैले अपेक्षा गरेको र पार्टी भित्र समेत बलियो पकड भएको भनेर चर्चा पाउनु भएकी श्रेष्ठको बहिरगमन पश्चात पार्टीले के कति क्षति बेहोरेको छ रास्वपाले समिक्षा गरेकै होला । त्यपछि फेरि अर्का नेता सन्तोष परियारले पनि एक्कसी पार्टी छाडेर नयाँ राजनीतिक अभियान प्रगतिशील लोकतान्त्रिक पार्टीमा सहभागि भएपछि रास्वपा छाड्नेको लहर किन लाग्यो भनेर प्रश्न उठ्यो । तर रास्वपाले यि गतिबिधिबाट बिचलित हुने भन्दा ठुलो छाति देखाएर आउनेहरुलाई स्वागत र जानेहरुलाई बिदाइ गर्ने प्रतिकृया दियो। रास्वपाले भित्रभित्रै विभिन्न दल र समाजमा अलग पहिचान बनाएका व्यक्तिहरुलाई पार्टीमा समावेश गरिरहेको छ । अहिले दैनिक जसो केन्द्रमा रहेको पार्टी कार्यालयमा र जिल्ला जिल्लामा समेत अन्य पार्टी छोडेर रास्वपामा प्रवेश गर्नेहरुको सङख्या बढिरहेको पार्टी महामन्त्री कबिन्द्र बुर्लाकोटीले जानकरी दिनु भएको छ ।

अन्तरिम सरकराले फागुन २१ का लागि तोकेको प्रतिनिधिसभा सदस्य चुनावका लागि रास्वापा सुरुवातती देखि नै उत्साहित देखिदै आएको छ । सुरुवातमा तत्कालिन माओवादी बाहेक सबैजसो ठुला दलहरुले चुनावमा सहभागि नहुने भन्दै संसद पुनर्स्थापनाको मुद्धा दिएर अदालत र सडकमा जाने बताएका बेला समेत रास्वपाले चुनावका लागि सरकारलाई सघाउने र जारी राजनीतिक सक्रमणको अन्त्यका लागि पनि चुनाव आवश्यक रहेको बताएको थियो । कालान्तरमा काँग्रेसले समेत चुनावमा जाने औपचारिक निर्णय गरिसकेको छ भने एमाले पनि निर्वाचन प्रयोजनका लागि आयोगमा दल दर्ता गरेर चुनावी प्रकृयामा सामेल भैसकेको छ । माओवादी र नेकपा एस लगायत साना कम्युनिष्ट पार्टी र समूहहरुको सहभागितामा बनेको नेपाली  कम्युनिष्ट पार्टी पनि चुनावी वातावरणको पक्षमा वकालत गरिरहेको छ । चुनाव गराएर निर्वाचित दललाई सत्ता हस्तान्तरण गर्ने लक्ष्यम रहेको सुशिला कार्की नेतृत्वको अन्तरिम सरकारको लक्ष्य पुरा गराउनका लागि पनि दलहरुले चुनावमा सहभागि हुनै पर्ने परिस्थिति छ । उता जनताको अभिमत लिई सत्तामा पुगेर देश र जनताको पक्षमा काम गर्नका लागि खुलेक दलहरुको औचित्य पुष्टि गर्न पनिस चुनावी वातावरण बन्न जरुरी छ ।